Évangiles en corse – Jean 1

Ghjuvanni

A Parola divintò carri

1 À principiu ci era a Parola, è a Parola era à cantu à Diu, è a Parola era Diu. 2 Edda à principiu era à cantu à Diua. [a Paragunà 1,1.2 cù Prv 8,22-26] 3 Tuttu si feci par via d'edda, è nudda di ciò chì hè statu fattu si feci senza eddab. [b Paragunà cù Gn 1,1-3 ; Sal 33,6.9 ; Col 1,16.17.] 4 In edda era a vita, è a vita era a luci di l'omini 5 È a luci luccicheghja in la bughjura, è u bughju ùn li feci locu.

6 Ci fù un omu, mandatu da Diu, si chjamaia Ghjuvanni.c [c Si tratta di Ghjuvanni u Battistu. Vede 1,19-36.] 7 Ghjunsi com'è tistimoniu, da tistimunià pà a luci, chì tutti cridissini par via d'eddu. 8 Eddu a luci ùn era, ma vensi à tistimunià pà a luci. 9 Era a luci a vera chì, vinindu in lu mondu, allumineghja ogni omu. 10 Era in u mondu, è u mondu fù par via d'eddad, è u mondu ùn la cunnisciti. [d Vede 1,3.] 11 Vensi in li so lochi è i soii ùn li fecini locu. 12 À tutti quiddi chì a ricivitini, li deti u puteri di divintà fiddoli di Diu, à quiddi chì credini in lu so nomue, [e Paragunà cù Gal 3,26 ; 1 Ghjv 3,1-2.] 13 è chì ùn sò micca nati da u sangui, nè da u vulè di a carri, nè da u vulè di l'omu, ma da Diu.

14 È a parola divintò carri è frà noi alzò a so tenda, è emu vistu a so gloriaf, com'è a gloria di u Fiddolu unicu di u Babbu, pienu di grazia è di virità. [f Paragunà cù Is 60,1-2] 15 Ghjuvanni li faci da tistimoniu, briona è dici : « eccu lu, quiddu di quali aghju dittu : ‘quiddu chì veni dopu à mè, mi hè passatu davanti chì prima cà mè era.’g » [g Si vega 1,30] 16 Chì da a so piinezza emu avutu calcosa noi tutti, grazia è po grazia. 17 Parchì a Legi fù data da Musèh, a grazia è a virità vensini da Ghjesucristu. [h Vede Es 31,18 ; v 34,28] 18 À Diu, nimu l'hà vistu maii ; Ma Diu Fiddolu unicu, chì hè in senu à u Babbu, u ci hà fattu cunnoscia. [i Paragunà cù Es 33,20]

A tistimunianza di Ghjuvanni u Battistu

(Mt 3,1-12 ; Mc 1,2-8 ; Lc 3,15-17)

19 Ed eccu a tistimunianza di Ghjuvanni, quandu i Ghjudei li mandetini da Ghjerusalema preti è Leviti par dumandà li : « Tù, quali sè ? » 20 Accittò è ùn li ricusò a risposta, è dissi : « Eiu ùn socu micca u Missia. » 21 È li dumandetini : « allora quali sè ? Alia ? » Eddu dissi : « innò. » « Sè un Prufeta ? » È risposi : « innòj. » [j Si vega Ml 3,23 ; Dt 18,15.18.] 22 Tandu li dissini : « quali sè ? Chì noi diami una risposta à quiddi chì ci ani mandatu. Tù, chì dici di tè ? » 23 Ghjuvanni dissi :

« Eiu,socu a boci di quiddu chì briona in lu disertu :
Apprunteti a strada di u Signori,k

com'eddu dissi u Prufeta Isaia. »[k Is 40,3.] 24 I mandataghji erani ghjenti di i Farusei. 25 Li faciani dumandi è diciani : « è chì battizi, sì tù ùn sè nè u Missia, nè Alia, nè u Prufeta ? » 26 Ghjuvanni li risposi è dissi : « eiu battizu in l'acqua ; ma in mezu à voi stà quiddu chì voi ùn cunnisciti, 27 quiddu veni dopu à mè, ed eiu ùn socu degnu di disciodda li i currighjini di i sanduli. » 28 Issi fatti stalvonu in Betanial, da Ghjurdanu in dà, duv'è Ghjuvanni battizaia. [l Betania : paesi di Ghjurdanu in dà. Ùn hè micca u paesi à cantu à Ghjerusalemi chì avia u listessu nomu.]

L'agneddu di Diu

29 U ghjornu dopu, visti à Ghjesù chì vinia à truvà lu, è dissi ; « eccu l'agneddu di Diu chì caccia i piccati di u mondu.m [m Paragunà cù Is 53,6-7.] 30 Hè d'eddu ch'e' aghju dittu : ‘quiddu chì veni dopu à mè mi hè passatu davanti, chì prima cà mè era.’ 31 Ed eiu mancu u cunnisciu, ma socu vinutu, eiu chì battizu cù l'acqua, da ch'eddu venghi palesu à Israela. » 32 È Ghjuvanni feci issa tistimunianza : « aghju vistu u Spiritu chì falaia da u celi com'è una culomba è chì li staia sopran. [n Paragunà cù Is 11,2 ; 61,1.] 33 Ed eiu mancu u cunnisciu, ma quiddu chì mi hà mandatu à battizà cù l'acqua mi dissi : ‘quiddu chì tù vidarè chì u Spiritu li fala sopra è ci stà, hè eddu chì battiza in lu Spiritu Santu.’ 34 Ed eiu aghju vistu è purtatu a tistimunianza chì quistu hè u Fiddolu di Diu. »

I prima discipuli

35 U ghjornu dopu, Ghjuvanni era dinò quandì dà cù dui di i so discipuli 36 è, fighjulendu à Ghjesù chì francaia, dissi : « eccu l'Agneddu di Diu.o » [o Vede 1,29] 37 È i dui discipuli u intesini è suvitetini à Ghjesù. 38 Ghjesù si vultò, i visti chì u suvitaiani è li dissi : « chì circheti ? » Ed eddi li risposini : « Rabbì — ciò chì si traduci ‘o Maestru’ — induva stai di casa ? » 39 Li dissi : « viniti chì vidareti. » Andetini,viditini duv'eddu staia, è, quiddu ghjornu,stetini cun eddu ; erani quattru ori dopu meziornu. 40 Andria, u frateddu di Simon Petru, era unu di i dui chì aiani intesu à Ghjuvanni è chì aiani suvitatu à Ghjesù. 41 Infattò prima à Simonu u frateddu è li dissi : « emu trovu u Missia. » — ciò chì si traduci ‘u Cristu » — 42 è u purteti ind'è Ghjesù ; Ghjesù u fighjulò è dissi : « tù sè Simonu, u fiddolu di Ghjuvanni, sarè chjamatu Cheffasp », — ciò chì si traduci ‘Petru’ —. [p Vede Chefas : parola arameana.]

Filippu è Natanaela sò chjamati

43 U ghjornu dopu Ghjesù volsi andà in Galilea, infattò à Filippu è li dissi : « suveta mi. » 44 Filippu era di Betsaida, a cità d'Andria è di Petru. 45 È Filippu andeti à truvà à Natanaela è li dissi : « emu trovu quiddu chì hè mintuvatu in la Legi di Musè è di i i Prufetaq, hè Ghjesù, u fiddolu di Ghjaseppu, di Nazarè. » [q Paragunà cù Dt 18,18 ; Is 9,5-6 ; Es v 34,23.] 46 È Natanaela li risposi : « È soca da Nazarè pò escia calcosa di bonu ? » È Filippu li dissi : « veni chì vidarè. » 47 Ghjesù visti à Natanaela chì vinia à truvà lu è dissi d'eddu : « eccu da veru un Israelatu senza falsità micca. » 48 È Natanaela li dissi : « è da induva po mi cunnosci ? » Ghjesù li risposi è dissi : « nanzi chì Filippu ti chjamessi, quand'ì tù eri sottu à a ficar, t'aghju vistu. » [r Fica : a Scrittura a lighjiani à spessu sottu à una fica.] 49 È Natanaela li risposi : « Rabbì, tù sè u Fiddolu di Diu, tù sè u Rè d'Israelas. » [s Paragunà cù Sal 2,7 ; Sof 3,15.] 50 Ghjesù risposi è li dissi : « parch'e' ti aghju dittu ch'e' t'aviu vistu sottu à a fica, tù credi ? Ai da veda altru cà cusì ! » 51 È li dissi : « a vi dicu da veru, eti da veda u celi apartu è l'Agnuli di Diu chì coddani è chì falani sopra à u Fiddolu di l'Omut. » [t Paragunà cù Gn 28,12.]