15 מִזְמ֗וֹר לְדָ֫וִ֥ד ֖יְהוָֹה מִי־יָג֣וּר בְּאָהֳלֶ֑ךָ מִֽי־֝יִשְׁכֹּ֗ן בְּהַ֣ר קָדְשֶֽׁךָ׃
2 הוֹלֵ֣ךְ ֖תָּמִים וּפֹעֵ֥ל צֶ֑דֶק וְדֹבֵ֥ר ֜אֱמֶ֗ת בִּלְבָבֽוֹ׃
3 לֹֽא־רָגַ֙ל| עַל־לְשֹׁנ֗וֹ לֹא־עָשָׂ֣ה לְרֵעֵ֣הוּ רָעָ֑ה ֜וְחֶרְפָּ֗ה לֹא־נָשָׂ֥א עַל־קְרֹֽבוֹ׃
4 נִבְזֶ֤ה| בְּֽעֵ֮ינָ֤יו נִמְאָ֗ס וְאֶת־יִרְאֵ֣י יְהוָ֣ה יְכַבֵּ֑ד נִשְׁבַּ֥ע ֜לְהָרַ֗ע וְלֹ֣א יָמִֽר׃
5 כַּסְפּ֤וֹ| לֹא־נָתַ֣ן בְּנֶשֶׁךְ֘ וְשֹׁ֥חַד עַל־נָקִ֗י לֹ֥א לָ֫קָ֥ח עֹֽשֵׂה־אֵ֑לֶּה לֹ֖א יִמּ֣וֹט לְעוֹלָֽם׃