63 מִזְמ֥וֹר לְדָוִ֑ד ֜בִּהְיוֹת֗וֹ בְּמִדְבַּ֥ר יְהוּדָֽה׃
2 אֱלֹהִ֤ים| אֵלִ֥י אַתָּ֗ה אֲֽשַׁחֲ֫רֶ֥ךָּ צָמְאָ֬ה לְכָ֨| נַפְשִׁ֗י כָּמַ֣הּ לְךָ֣ בְשָׂרִ֑י בְּאֶֽרֶץ־צִיָּ֖ה וְעָיֵ֣ף בְּלִי־מָֽיִם׃
3 ֖כֵּן בַּקֹּ֣דֶשׁ חֲזִיתִ֑יךָ לִרְא֥וֹת ֜עֻזְּךָ֗ וּכְבוֹדֶֽךָ׃
4 כִּי־ט֣וֹב ֖חַסְדְּךָ מֵֽחַיִּ֗ים שְׂפָתַ֥י יְשַׁבְּחֽוּנְךָ׃
5 כֵּ֣ן אֲבָרֶכְךָ֣ בְחַיָּ֑י ֜בְּשִׁמְךָ אֶשָּׂ֥א כַפָּֽי׃
6 כְּמ֚וֹ חֵ֣לֶב ֖וָדֶשֶׁן תִּשְׂבַּ֣ע נַפְשִׁ֑י וְשִׂפְתֵ֥י ֜רְנָנ֗וֹת יְהַלֶּל־פִּֽי׃
7 אִם־זְכַרְתִּ֥יךָ עַל־יְצוּעָ֑י ֜בְּאַשְׁמֻר֗וֹת אֶהְגֶּה־בָּֽךְ׃
8 כִּֽי־הָיִ֣יתָ עֶזְרָ֣תָה לִּ֑י וּבְצֵ֖ל כְּנָפֶ֣יךָ אֲרַנֵּֽן׃
9 דָּבְקָ֣ה נַפְשִׁ֣י אַחֲרֶ֑יךָ ֜בִּ֗י תָּמְכָ֥ה יְמִינֶֽךָ׃
10 וְהֵ֗מָּה ֖לְשׁוֹאָה יְבַקְשׁ֣וּ נַפְשִׁ֑י ֜יָבֹ֗אוּ בְּֽתַחְתִּיּ֥וֹת הָאָֽרֶץ׃
11 יַגִּירֻ֥הוּ עַל־יְדֵי־חָ֑רֶב מְנָ֖ת שֻׁעָלִ֣ים יִהְיֽוּ׃
12 וְהַמֶּלֶךְ֘ יִשְׂמַ֪ח בֵּאלֹ֫הִ֥ים ֖יִתְהַלֵּל כָּל־הַנִּשְׁבָּ֣ע בּ֑וֹ כִּ֥י ֜יִסָּכֵ֗ר פִּ֣י דֽוֹבְרֵי־שָֽׁקֶר׃