35 וַיַּ֥עַן אֱלִיה֗וּ וַיֹּאמַֽר׃
2 ֖הֲזֹאת חָשַׁ֣בְתָּ לְמִשְׁפָּ֑ט ֜אָמַ֗רְתָּ צִדְקִ֥י מֵאֵֽל׃
3 כִּֽי־תֹ֖אמַר מַה־יִּסְכָּן־לָ֑ךְ מָֽה־֜אֹעִ֗יל מֵֽחַטָּאתִֽי׃
4 ֖אֲנִי אֲשִֽׁיבְךָ֣ מִלִּ֑ין וְֽאֶת־רֵעֶ֥יךָ עִמָּֽךְ׃
5 הַבֵּ֣ט שָׁמַ֣יִם וּרְאֵ֑ה וְשׁ֥וּר ֜שְׁחָקִ֗ים גָּבְה֥וּ מִמֶּֽךָּ׃
6 אִם־֖חָטָאתָ מַה־תִּפְעָל־בּ֑וֹ וְרַבּ֥וּ ֜פְשָׁעֶ֗יךָ מַה־תַּעֲשֶׂה־לּֽוֹ׃
7 אִם־֖צָדַקְתָּ מַה־תִּתֶּן־ל֑וֹ א֖וֹ מַה־מִיָּדְךָ֥ יִקָּֽח׃
8 לְאִישׁ־כָּמ֥וֹךָ רִשְׁעֶ֑ךָ וּלְבֶן־֜אָדָ֗ם צִדְקָתֶֽךָ׃
9 ֖מֵרֹב עֲשׁוּקִ֣ים יַזְעִ֑יקוּ יְשַׁוְּע֖וּ מִזְּר֣וֹעַ רַבִּֽים׃
10 וְֽלֹא־אָמַ֗ר ֖אַיֵּה אֱל֣וֹהַּ עֹשָׂ֑י נֹתֵ֖ן זְמִר֣וֹת בַּלָּֽיְלָה׃
11 ֖מַלְּפֵנוּ מִבַּהֲמ֣וֹת אָ֑רֶץ וּמֵע֖וֹף הַשָּׁמַ֣יִם יְחַכְּמֵֽנוּ׃
12 שָׁ֣ם ֖יִצְעֲקוּ וְלֹ֣א יַעֲנֶ֑ה ֜מִפְּנֵ֗י גְּא֣וֹן רָעִֽים׃
13 אַךְ־֖שָׁוְא לֹא־יִשְׁמַ֥ע| אֵ֑ל ֜וְשַׁדַּ֗י לֹ֣א יְשׁוּרֶֽנָּה׃
14 אַ֣ף כִּֽי־תֹ֖אמַר לֹ֣א תְשׁוּרֶ֑נּוּ דִּ֥ין ֜לְפָנָ֗יו וּתְח֥וֹלֵֽל לֽוֹ׃
15 וְעַתָּ֗ה כִּי־֖אַיִן פָּקַ֣ד אַפּ֑וֹ וְלֹֽא־יָדַ֖ע בַּפַּ֣שׁ מְאֹֽד׃
16 ֖וְאִיּוֹב הֶ֣בֶל יִפְצֶה־פִּ֑יהוּ בִּבְלִי־֝דַ֗עַת מִלִּ֥ין יַכְבִּֽר׃