108 שִׁ֖יר מִזְמ֣וֹר לְדָוִֽד׃
2 נָכ֣וֹן לִבִּ֣י אֱלֹהִ֑ים אָשִׁ֥ירָה ֜וַאֲזַמְּרָ֗ה אַף־כְּבוֹדִֽי׃
3 ֖עוּרָֽה הַנֵּ֥בֶל וְכִנּ֗וֹר אָעִ֥ירָה שָּֽׁחַר׃
4 אוֹדְךָ֖ בָעַמִּ֥ים| יְהוָ֑ה ֜וַאֲזַמֶּרְךָ֗ בַּל־אֻמִּֽים׃
5 כִּֽי־גָד֣וֹל מֵֽעַל־שָׁמַ֣יִם חַסְדֶּ֑ךָ וְֽעַד־שְׁחָקִ֥ים אֲמִתֶּֽךָ׃
6 ר֣וּמָה עַל־שָׁמַ֣יִם אֱלֹהִ֑ים וְעַ֖ל כָּל־הָאָ֣רֶץ כְּבוֹדֶֽךָ׃
7 ֖לְמַעַן יֵחָלְצ֣וּן יְדִידֶ֑יךָ הוֹשִׁ֖יעָה יְמִֽינְךָ֣ וַעֲנֵֽנִי׃
8 אֱלֹהִ֤ים| דִּבֶּ֥ר בְּקָדְשׁ֗וֹ אֶעְלֹ֥זָה אֲחַלְּקָ֥ה שְׁכֶ֑ם וְעֵ֖מֶק סֻכּ֣וֹת אֲמַדֵּֽד׃
9 לִ֤י גִלְעָ֨ד| לִ֤י מְנַשֶּׁ֗ה ֖וְאֶפְרַיִם מָע֣וֹז רֹאשִׁ֑י ֜יְהוּדָ֗ה מְחֹקְקִֽי׃
10 מוֹאָ֤ב| סִ֬יר רַחְצִ֗י עַל־֖אֱדוֹם אַשְׁלִ֣יךְ נַעֲלִ֑י עֲלֵֽי־֝פְלֶ֗שֶׁת אֶתְרוֹעָֽע׃
11 מִ֣י ֖יֹבִלֵנִי עִ֣יר מִבְצָ֑ר מִ֖י נָחַ֣נִי עַד־אֱדֽוֹם׃
12 הֲלֹֽא־אֱלֹהִ֥ים זְנַחְתָּ֑נוּ וְֽלֹא־תֵצֵ֥א ֜אֱלֹהִ֗ים בְּצִבְאֹתֵֽינוּ׃
13 הָֽבָה־לָּ֣נוּ עֶזְרָ֣ת מִצָּ֑ר ֜וְשָׁ֗וְא תְּשׁוּעַ֥ת אָדָֽם׃
14 בֵּֽאלֹהִ֥ים נַעֲשֶׂה־חָ֑יִל ֜וְה֗וּא יָב֥וּס צָרֵֽינוּ׃