111 הַ֥לְלוּ יָ֙הּ| אוֹדֶ֣ה ֖יְהוָה בְּכָל־לֵבָ֑ב בְּס֖וֹד יְשָׁרִ֣ים וְעֵדָֽה׃
2 ֖גְּדֹלִים מַעֲשֵׂ֣י יְהוָ֑ה ֜דְּרוּשִׁ֗ים לְכָל־חֶפְצֵיהֶֽם׃
3 הוֹד־וְהָדָ֥ר פָּֽעֳל֑וֹ ֜וְצִדְקָת֗וֹ עֹמֶ֥דֶת לָעַֽד׃
4 זֵ֣כֶר ֖עָשָׂה לְנִפְלְאֹתָ֑יו חַנּ֖וּן וְרַח֣וּם יְהוָֽה׃
5 ֖טֶרֶף נָתַ֣ן לִֽירֵאָ֑יו יִזְכֹּ֖ר לְעוֹלָ֣ם בְּרִיתֽוֹ׃
6 כֹּ֣חַ ֖מַעֲשָׂיו הִגִּ֣יד לְעַמּ֑וֹ לָתֵ֥ת ֜לָהֶ֗ם נַחֲלַ֥ת גּוֹיִֽם׃
7 מַעֲשֵׂ֣י ֖יָדָיו אֱמֶ֣ת וּמִשְׁפָּ֑ט ֜נֶאֱמָנִ֗ים כָּל־פִּקּוּדָֽיו׃
8 סְמוּכִ֣ים לָעַ֣ד לְעוֹלָ֑ם ֜עֲשׂוּיִ֗ם בֶּאֱמֶ֥ת וְיָשָֽׁר׃
9 פְּד֚וּת| שָׁ֮לַ֤ח לְעַמּ֗וֹ צִוָּֽה־לְעוֹלָ֥ם בְּרִית֑וֹ קָד֭וֹשׁ וְנוֹרָ֣א שְׁמֽוֹ׃
10 רֵ֮אשִׁ֤ית חָכְמָ֨ה| יִרְאַ֬ת יְהוָ֗ה שֵׂ֣כֶל ט֖וֹב לְכָל־עֹשֵׂיהֶ֑ם ֜תְּהִלָּת֗וֹ עֹמֶ֥דֶת לָעַֽד׃