114 בְּצֵ֣את ֖יִשְׂרָאֵל מִמִּצְרָ֑יִם בֵּ֥ית ֜יַעֲקֹ֗ב מֵעַ֥ם לֹעֵֽז׃
2 הָיְתָ֣ה יְהוּדָ֣ה לְקָדְשׁ֑וֹ ֜יִשְׂרָאֵ֗ל מַמְשְׁלוֹתָֽיו׃
3 הַיָּ֣ם ֖רָאָה וַיָּנֹ֑ס ֜הַיַּרְדֵּ֗ן יִסֹּ֥ב לְאָחֽוֹר׃
4 ֖הֶֽהָרִים רָקְד֣וּ כְאֵילִ֑ים ֜גְּבָע֗וֹת כִּבְנֵי־צֹֽאן׃
5 מַה־לְּךָ֣ ֖הַיָּם כִּ֣י תָנ֑וּס ֜הַיַּרְדֵּ֗ן תִּסֹּ֥ב לְאָחֽוֹר׃
6 ֖הֶֽהָרִים תִּרְקְד֣וּ כְאֵילִ֑ים ֜גְּבָע֗וֹת כִּבְנֵי־צֹֽאן׃
7 מִלִּפְנֵ֣י ֖אָדוֹן ח֣וּלִי אָ֑רֶץ ֜מִלִּפְנֵ֗י אֱל֣וֹהַּ יַעֲקֹֽב׃
8 הַהֹפְכִ֣י הַצּ֣וּר אֲגַם־מָ֑יִם ֜חַלָּמִ֗ישׁ לְמַעְיְנוֹ־מָֽיִם׃