13 לַמְנַצֵּ֗חַ מִזְמ֥וֹר לְדָוִֽד׃
2 עַד־אָ֣נָה ֖יְהוָה תִּשְׁכָּחֵ֣נִי נֶ֑צַח עַד־אָ֓נָה| תַּסְתִּ֖יר אֶת־פָּנֶ֣יךָ מִמֶּֽנִּי׃
3 עַד־אָ֨נָה אָשִׁ֪ית עֵצ֡וֹת בְּנַפְשִׁ֗י יָג֣וֹן בִּלְבָבִ֣י יוֹמָ֑ם עַד־אָ֓נָה| יָר֭וּם אֹיְבִ֣י עָלָֽי׃
4 הַבִּ֣יטָֽה ֖עֲנֵנִי יְהוָ֣ה אֱלֹהָ֑י הָאִ֥ירָה ֜עֵינַ֗י פֶּן־אִישַׁ֥ן הַמָּֽוֶת׃
5 פֶּן־יֹאמַ֣ר אֹיְבִ֣י יְכָלְתִּ֑יו צָרַ֥י ֜יָגִ֗ילוּ כִּ֣י אֶמּֽוֹט׃
6 וַאֲנִ֤י| בְּחַסְדְּךָ֣ בָטַחְתִּי֘ יָ֤גֵ֥ל לִבִּ֗י בִּֽישׁוּעָ֫תֶ֥ךָ אָשִׁ֥ירָה לַיהוָ֑ה כִּ֖י גָמַ֣ל עָלָֽי׃