137 עַ֥ל נַהֲר֨וֹת| בָּבֶ֗ל שָׁ֣ם ֖יָשַׁבְנוּ גַּם־בָּכִ֑ינוּ ֜בְּזָכְרֵ֗נוּ אֶת־צִיּֽוֹן׃
2 עַֽל־עֲרָבִ֥ים בְּתוֹכָ֑הּ ֜תָּלִ֗ינוּ כִּנֹּרוֹתֵֽינוּ׃
3 כִּ֤י שָׁ֨ם שְֽׁאֵל֪וּנוּ שׁוֹבֵ֡ינוּ דִּבְרֵי־֖שִׁיר וְתוֹלָלֵ֣ינוּ שִׂמְחָ֑ה שִׁ֥ירוּ ֜לָ֗נוּ מִשִּׁ֥יר צִיּֽוֹן׃
4 אֵ֗יךְ נָשִׁ֥יר אֶת־שִׁיר־יְהוָ֑ה ֜עַ֗ל אַדְמַ֥ת נֵכָֽר׃
5 אִֽם־אֶשְׁכָּחֵ֥ךְ יְֽרוּשָׁלִָ֗ם תִּשְׁכַּ֥ח יְמִינִֽי׃
6 תִּדְבַּ֥ק־לְשׁוֹנִ֙י| לְחִכִּי֘ אִם־לֹ֪א אֶ֫זְכְּרֵ֥כִי אִם־לֹ֣א ֖אַעֲלֶה אֶת־יְרוּשָׁלִַ֑ם ֜עַ֗ל רֹ֣אשׁ שִׂמְחָתִֽי׃
7 זְכֹ֚ר יְהוָ֙ה| לִבְנֵ֬י אֱד֗וֹם אֵת֘ י֚וֹם יְֽרוּשָׁ֫לִָ֥ם ֖הָאֹ֣מְרִים עָ֤רוּ| עָ֑רוּ ֜עַ֗ד הַיְס֥וֹד בָּֽהּ׃
8 בַּת־בָּבֶ֗ל הַשְּׁד֫וּדָ֥ה אַשְׁרֵ֥י שֶׁיְשַׁלֶּם־לָ֑ךְ אֶת־֜גְּמוּלֵ֗ךְ שֶׁגָּמַ֥לְתְּ לָֽנוּ׃
9 אַשְׁרֵ֚י| שֶׁיֹּאחֵ֓ז וְנִפֵּ֬ץ אֶֽת־֜עֹלָלַ֗יִךְ אֶל־הַסָּֽלַע׃