140 לַמְנַצֵּ֗חַ מִזְמ֥וֹר לְדָוִֽד׃
2 חַלְּצֵ֣נִי ֖יְהוָה מֵאָדָ֣ם רָ֑ע מֵאִ֖ישׁ חֲמָסִ֣ים תִּנְצְרֵֽנִי׃
3 אֲשֶׁ֤ר חָשְׁב֣וּ רָע֣וֹת בְּלֵ֑ב כָּל־֜י֗וֹם יָג֥וּרוּ מִלְחָמֽוֹת׃
4 שָֽׁנֲנ֣וּ לְשׁוֹנָם֘ כְּֽמוֹ־נָ֫חָ֥שׁ חֲמַ֥ת עַכְשׁ֑וּב תַּ֖חַת שְׂפָתֵ֣ימוֹ סֶֽלָה׃
5 שָׁמְרֵ֚נִי יְהוָ֙ה| מִ֮ידֵ֚י רָשָׁ֗ע מֵאִ֣ישׁ חֲמָסִ֣ים תִּנְצְרֵ֑נִי אֲשֶׁ֥ר ֜חָשְׁב֗וּ לִדְח֥וֹת פְּעָמָֽי׃
6 טָֽמְנֽוּ־גֵאִ֨ים| פַּ֡ח לִ֗י וַחֲבָלִ֗ים פָּ֣רְשׂוּ ֖רֶשֶׁת לְיַד־מַעְגָּ֑ל מֹקְשִׁ֖ים שָֽׁתוּ־לִ֣י סֶֽלָה׃
7 אָמַ֣רְתִּי ֖לַיהוָה אֵ֣לִי אָ֑תָּה הַאֲזִ֥ינָה ֜יְהוָ֗ה ק֣וֹל תַּחֲנוּנָֽי׃
8 יְהוִֹ֣ה ֖אֲדֹנָי עֹ֣ז יְשׁוּעָתִ֑י סַכֹּ֥תָה ֜לְרֹאשִׁ֗י בְּי֣וֹם נָֽשֶׁק׃
9 אַל־תִּתֵּ֣ן ֖יְהוָה מַאֲוַיֵּ֣י רָשָׁ֑ע זְמָמ֥וֹ אַל־֜תָּפֵ֗ק יָר֥וּמוּ סֶֽלָה׃
10 רֹ֥אשׁ מְסִבָּ֑י עֲמַ֖ל שְׂפָתֵ֣ימוֹ יכסומו ֯׃
11 ימיטו ֯ עֲלֵיהֶ֗ם גֶּֽחָ֫לִ֥ים בָּאֵ֥שׁ יַפִּלֵ֑ם ֜בְּמַהֲמֹר֗וֹת בַּֽל־יָקֽוּמוּ׃
12 אִ֥ישׁ לָשׁוֹן֘ בַּל־יִכּ֪וֹן בָּ֫אָ֥רֶץ אִישׁ־חָמָ֥ס רָ֑ע ֜יְצוּדֶ֗נּוּ לְמַדְחֵפֹֽת׃
13 ידעת ֯ כִּֽי־יַעֲשֶׂ֣ה ֖יְהוָה דִּ֣ין עָנִ֑י ֜מִשְׁפַּ֗ט אֶבְיֹנִֽים׃
14 אַ֣ךְ ֖צַדִּיקִים יוֹד֣וּ לִשְׁמֶ֑ךָ יֵשְׁב֥וּ ֜יְשָׁרִ֗ים אֶת־פָּנֶֽיךָ׃