26 לְדָוִ֙ד| שָׁפְטֵ֤נִי יְהוָ֗ה כִּֽי־֖אֲנִי בְתֻמִּ֣י הָלַ֑כְתִּי וּבַיהוָ֥ה ֜בָּטַ֗חְתִּי לֹ֣א אֶמְעָֽד׃
2 בְּחָנֵ֣נִי יְהוָ֣ה וְנַסֵּ֑נִי צרופה ֯ כִלְיוֹתַ֣י וְלִבִּֽי׃
3 כִּֽי־֖חַסְדְּךָ לְנֶ֣גֶד עֵינָ֑י ֜וְהִתְהַלַּ֗כְתִּי בַּאֲמִתֶּֽךָ׃
4 לֹא־֖יָשַׁבְתִּי עִם־מְתֵי־שָׁ֑וְא וְעִ֥ם ֜נַעֲלָמִ֗ים לֹ֣א אָבֽוֹא׃
5 ֖שָׂנֵאתִי קְהַ֣ל מְרֵעִ֑ים וְעִם־֜רְשָׁעִ֗ים לֹ֣א אֵשֵֽׁב׃
6 אֶרְחַ֣ץ בְּנִקָּי֣וֹן כַּפָּ֑י וַאֲסֹבְבָ֖ה אֶת־מִזְבַּחֲךָ֣ יְהוָֽה׃
7 ֖לַשְׁמִעַ בְּק֣וֹל תּוֹדָ֑ה ֜וּלְסַפֵּ֗ר כָּל־נִפְלְאוֹתֶֽיךָ׃
8 יְֽהוָ֗ה ֖אָהַבְתִּי מְע֣וֹן בֵּיתֶ֑ךָ ֜וּמְק֗וֹם מִשְׁכַּ֥ן כְּבוֹדֶֽךָ׃
9 אַל־תֶּאֱסֹ֣ף עִם־חַטָּאִ֣ים נַפְשִׁ֑י וְעִם־אַנְשֵׁ֖י דָמִ֣ים חַיָּֽי׃
10 אֲשֶׁר־בִּידֵיהֶ֥ם זִמָּ֑ה ֜וִֽימִינָ֗ם מָ֣לְאָה שֹּֽׁחַד׃
11 ֖וַאֲנִי בְּתֻמִּ֥י אֵלֵ֗ךְ פְּדֵ֣נִי וְחָנֵּֽנִי׃
12 ֖רַגְלִי עָֽמְדָ֣ה בְמִישׁ֑וֹר ֜בְּמַקְהֵלִ֗ים אֲבָרֵ֥ךְ יְהוָֽה׃