3 מִזְמ֥וֹר לְדָוִ֑ד ֜בְּבָרְח֗וֹ מִפְּנֵ֤י| אַבְשָׁל֬וֹם בְּנֽוֹ׃
2 ֖יְהוָה מָֽה־רַבּ֣וּ צָרָ֑י ֜רַבִּ֗ים קָמִ֥ים עָלָֽי׃
3 רַבִּים֘ אֹמְרִ֪ים לְנַ֫פְשִׁ֥י אֵ֤ין יְֽשׁוּעָ֓תָה לּ֬וֹ בֵֽאלֹהִ֬ים סֶֽלָה׃
4 וְאַתָּ֣ה ֖יְהוָה מָגֵ֣ן בַּעֲדִ֑י ֜כְּבוֹדִ֗י וּמֵרִ֥ים רֹאשִֽׁי׃
5 ֖קוֹלִי אֶל־יְהוָ֣ה אֶקְרָ֑א וַיַּֽעֲנֵ֙נִי מֵהַ֖ר קָדְשׁ֣וֹ סֶֽלָה׃
6 אֲנִ֥י שָׁכַ֗בְתִּי וָֽאִ֫ישָׁ֥נָה הֱקִיצ֑וֹתִי כִּ֖י יְהוָ֣ה יִסְמְכֵֽנִי׃
7 לֹֽא־֖אִירָא מֵרִבְב֥וֹת עָ֑ם אֲשֶׁ֥ר ֜סָבִ֗יב שָׁ֣תוּ עָלָֽי׃
8 ק֮וּמָ֤ה יְהוָ֙ה| הוֹשִׁ֮יעֵ֤נִי אֱלֹהַ֗י כִּֽי־הִכִּ֣יתָ אֶת־כָּל־אֹיְבַ֣י לֶ֑חִי שִׁנֵּ֖י רְשָׁעִ֣ים שִׁבַּֽרְתָּ׃
9 לַיהוָ֥ה הַיְשׁוּעָ֑ה עַֽל־עַמְּךָ֖ בִרְכָתֶ֣ךָ סֶּֽלָה׃