36 לַמְנַצֵּ֬חַ| לְעֶֽבֶד־יְהוָ֬ה לְדָוִֽד׃
2 נְאֻֽם־פֶּ֣שַׁע ֖לָרָשָׁע בְּקֶ֣רֶב לִבִּ֑י אֵֽין־פַּ֥חַד ֜אֱלֹהִ֗ים לְנֶ֣גֶד עֵינָֽיו׃
3 כִּֽי־הֶחֱלִ֣יק אֵלָ֣יו בְּעֵינָ֑יו לִמְצֹ֖א עֲוֹנ֣וֹ לִשְׂנֹֽא׃
4 דִּבְרֵי־֖פִיו אָ֣וֶן וּמִרְמָ֑ה חָדַ֖ל לְהַשְׂכִּ֣יל לְהֵיטִֽיב׃
5 אָ֤וֶן| יַחְשֹׁ֗ב עַֽל־מִשְׁכָּ֫ב֥וֹ ֖יִתְיַצֵּב עַל־דֶּ֣רֶךְ לֹא־ט֑וֹב ֜רָ֗ע לֹ֣א יִמְאָֽס׃
6 ֖יְהוָה בְּהַשָּׁמַ֣יִם חַסְדֶּ֑ךָ ֜אֱמֽוּנָתְךָ֗ עַד־שְׁחָקִֽים׃
7 צִדְקָֽתְכָ| כְּֽהַרְרֵי־אֵ֗ל ֖מִשְׁפָּטֶךָ תְּה֣וֹם רַבָּ֑ה אָ֤דָֽם־וּבְהֵמָ֖ה תוֹשִׁ֣יעַ יְהוָֽה׃
8 מַה־יָּקָ֥ר חַסְדְּךָ֗ אֱלֹ֫הִ֥ים וּבְנֵ֥י אָדָ֑ם בְּצֵ֥ל ֜כְּנָפֶ֗יךָ יֶחֱסָיֽוּן׃
9 ֖יִרְוְיֻן מִדֶּ֣שֶׁן בֵּיתֶ֑ךָ וְנַ֖חַל עֲדָנֶ֣יךָ תַשְׁקֵֽם׃
10 כִּֽי־֖עִמְּךָ מְק֣וֹר חַיִּ֑ים ֜בְּאוֹרְךָ֗ נִרְאֶה־אֽוֹר׃
11 מְשֹׁ֣ךְ ֖חַסְדְּךָ לְיֹדְעֶ֑יךָ ֜וְצִדְקָֽתְךָ֗ לְיִשְׁרֵי־לֵֽב׃
12 אַל־֖תְּבוֹאֵנִי רֶ֣גֶל גַּאֲוָ֑ה וְיַד־֜רְשָׁעִ֗ים אַל־תְּנִדֵֽנִי׃
13 שָׁ֣ם ֖נָפְלוּ פֹּ֣עֲלֵי אָ֑וֶן ֜דֹּח֗וּ וְלֹא־יָ֥כְלוּ קֽוּם׃