48 שִׁ֥יר ֜מִזְמוֹר לִבְנֵי־קֹֽרַח׃
2 גָּ֮ד֚וֹל יְהוָ֣ה וּמְהֻלָּ֣ל מְאֹ֑ד בְּעִ֥יר ֜אֱלֹהֵ֗ינוּ הַר־קָדְשֽׁוֹ׃
3 יְפֵ֥ה נוֹף֘ מְשׂ֪וֹשׂ כָּל־הָ֫אָ֥רֶץ הַר־֖צִיּוֹן יַרְכְּתֵ֣י צָפ֑וֹן ֜קִרְיַ֗ת מֶ֣לֶךְ רָֽב׃
4 אֱלֹהִ֥ים בְּאַרְמְנוֹתֶ֗יהָ נוֹדַ֥ע לְמִשְׂגָּֽב׃
5 כִּֽי־הִנֵּ֣ה ֖הַמְּלָכִים נֽוֹעֲד֑וּ עָבְר֥וּ יַחְדָּֽו׃
6 הֵ֣מָּה ֖רָאוּ כֵּ֣ן תָּמָ֑הוּ נִבְהֲל֥וּ נֶחְפָּֽזוּ׃
7 ֖רְעָדָה אֲחָזָ֣תַם שָׁ֑ם ֜חִ֗יל כַּיּוֹלֵֽדָה׃
8 בְּר֥וּחַ קָדִ֑ים ֜תְּשַׁבֵּ֗ר אֳנִיּ֥וֹת תַּרְשִֽׁישׁ׃
9 כַּאֲשֶׁ֤ר שָׁמַ֨עְנוּ| כֵּ֤ן רָאִ֗ינוּ בְּעִיר־יְהוָ֣ה ֖צְבָאוֹת בְּעִ֣יר אֱלֹהֵ֑ינוּ אֱלֹ֮הִ֤ים יְכוֹנְנֶ֖הָ עַד־עוֹלָ֣ם סֶֽלָה׃
10 דִּמִּ֣ינוּ אֱלֹהִ֣ים חַסְדֶּ֑ךָ ֜בְּקֶ֗רֶב הֵיכָלֶֽךָ׃
11 כְּשִׁמְךָ֤ אֱלֹהִ֗ים כֵּ֣ן ֖תְּהִלָּתְךָ עַל־קַצְוֵי־אֶ֑רֶץ ֜צֶ֗דֶק מָלְאָ֥ה יְמִינֶֽךָ׃
12 יִשְׂמַ֤ח| הַר־צִיּ֗וֹן ֖תָּגֵלְנָה בְּנ֣וֹת יְהוּדָ֑ה ֜לְמַ֗עַן מִשְׁפָּטֶֽיךָ׃
13 סֹ֣בּוּ ֖צִיּוֹן וְהַקִּיפ֑וּהָ ֜סִפְר֗וּ מִגְדָּלֶֽיהָ׃
14 שִׁ֤יתוּ לִבְּכֶ֨ם| לְֽחֵילָ֗ה פַּסְּג֥וּ אַרְמְנוֹתֶ֑יהָ לְמַ֥עַן ֜תְּסַפְּר֗וּ לְד֣וֹר אַחֲרֽוֹן׃
15 כִּ֤י זֶ֙ה| אֱלֹהִ֣ים ֖אֱלֹהֵינוּ עוֹלָ֣ם וָעֶ֑ד ה֖וּא יְנַהֲגֵ֣נוּ עַל־מֽוּת׃