56 לַמְנַצֵּ֤חַ| עַל־י֬וֹנַת אֵ֣לֶם ֖רְחֹקִים לְדָוִ֣ד מִכְתָּ֑ם בֶּֽאֱחֹ֨ז אֹת֖וֹ פְלִשְׁתִּ֣ים בְּגַֽת׃
2 חָנֵּ֣נִי ֖אֱלֹהִים כִּֽי־שְׁאָפַ֣נִי אֱנ֑וֹשׁ כָּל־֜הַיּ֗וֹם לֹחֵ֥ם יִלְחָצֵֽנִי׃
3 שָׁאֲפ֣וּ ֖שׁוֹרְרַי כָּל־הַיּ֑וֹם כִּֽי־רַבִּ֨ים לֹחֲמִ֖ים לִ֣י מָרֽוֹם׃
4 י֥וֹם אִירָ֑א ֜אֲנִ֗י אֵלֶ֥יךָ אֶבְטָֽח׃
5 בֵּאלֹהִים֘ אֲהַלֵּ֪ל דְּבָ֫ר֥וֹ בֵּאלֹהִ֣ים ֖בָּטַחְתִּי לֹ֣א אִירָ֑א מַה־יַּעֲשֶׂ֖ה בָשָׂ֣ר לִֽי׃
6 כָּל־֖הַיּוֹם דְּבָרַ֣י יְעַצֵּ֑בוּ עָלַ֖י כָּל־מַחְשְׁבֹתָ֣ם לָרָֽע׃
7 יָג֚וּרוּ| יצפינו ֯ ֖הֵמָּה עֲקֵבַ֣י יִשְׁמֹ֑רוּ ֜כַּאֲשֶׁ֗ר קִוּ֥וּ נַפְשִֽׁי׃
8 עַל־אָ֥וֶן פַּלֶּט־לָ֑מוֹ ֜בְּאַ֗ף עַמִּ֤ים| הוֹרֵ֬ד אֱלֹהִֽים׃
9 נֹדִי֘ סָפַ֪רְתָּ֫ה אָ֥תָּה שִׂ֣ימָה דִמְעָתִ֣י בְנֹאדֶ֑ךָ ֜הֲלֹ֗א בְּסִפְרָתֶֽךָ׃
10 אָֽ֨ז יָ֮שׁ֚וּבוּ אוֹיְבַ֣י ֖אָחוֹר בְּי֣וֹם אֶקְרָ֑א זֶה־֜יָדַ֗עְתִּי כִּֽי־אֱלֹהִ֥ים לִֽי׃
11 ֖בֵּֽאלֹהִים אֲהַלֵּ֣ל דָּבָ֑ר ֜בַּיהוָ֗ה אֲהַלֵּ֥ל דָּבָֽר׃
12 בֵּֽאלֹהִ֣ים ֖בָּטַחְתִּי לֹ֣א אִירָ֑א מַה־יַּעֲשֶׂ֖ה אָדָ֣ם לִֽי׃
13 עָלַ֣י אֱלֹהִ֣ים נְדָרֶ֑יךָ אֲשַׁלֵּ֖ם תּוֹדֹ֣ת לָֽךְ׃
14 כִּ֤י הִצַּ֪לְתָּ נַפְשִׁ֡י מִמָּוֶת֘ הֲלֹ֥א רַגְלַ֗י מִ֫דֶּ֥חִי ֖לְהִֽתְהַלֵּךְ לִפְנֵ֣י אֱלֹהִ֑ים ֜בְּא֗וֹר הַֽחַיִּֽים׃