61 לַמְנַצֵּ֬חַ| עַֽל־נְגִינַ֬ת לְדָוִֽד׃
2 שִׁמְעָ֣ה ֖אֱלֹהִים רִנָּתִ֑י ֜הַקְשִׁ֗יבָה תְּפִלָּתִֽי׃
3 מִקְצֵ֤ה הָאָ֨רֶץ| אֵלֶ֣יךָ ֖אֶקְרָא בַּעֲטֹ֣ף לִבִּ֑י בְּצוּר־יָר֭וּם מִמֶּ֣נִּי תַנְחֵֽנִי׃
4 כִּֽי־הָיִ֣יתָ מַחְסֶ֣ה לִ֑י מִגְדַּל־֜עֹ֗ז מִפְּנֵ֥י אוֹיֵֽב׃
5 אָג֣וּרָה ֖בְאָהָלְךָ עוֹלָמִ֑ים אֶֽחֱסֶ֨ה בְסֵ֖תֶר כְּנָפֶ֣יךָ סֶּֽלָה׃
6 כִּֽי־אַתָּ֣ה ֖אֱלֹהִים שָׁמַ֣עְתָּ לִנְדָרָ֑י נָתַ֥תָּ ֜יְרֻשַּׁ֗ת יִרְאֵ֥י שְׁמֶֽךָ׃
7 יָמִ֣ים עַל־יְמֵי־מֶ֣לֶךְ תּוֹסִ֑יף ֜שְׁנוֹתָ֗יו כְּמוֹ־דֹ֥ר וָדֹֽר׃
8 יֵשֵׁ֣ב ֖עוֹלָם לִפְנֵ֣י אֱלֹהִ֑ים חֶ֥סֶד ֜וֶאֱמֶ֗ת מַ֣ן יִנְצְרֻֽהוּ׃
9 כֵּ֤ן אֲזַמְּרָ֣ה שִׁמְךָ֣ לָעַ֑ד לְֽשַׁלְּמִ֥י נְדָרַ֗י י֣וֹם| יֽוֹם׃