65 לַמְנַצֵּ֥חַ מִזְמ֗וֹר לְדָוִ֥ד שִֽׁיר׃
2 לְךָ֤ דֻֽמִיָּ֬ה תְהִלָּ֓ה אֱלֹ֮הִ֥ים בְּצִיּ֑וֹן ֜וּלְךָ֗ יְשֻׁלַּם־נֶֽדֶר׃
3 שֹׁמֵ֥עַ תְּפִלָּ֑ה ֜עָדֶ֗יךָ כָּל־בָּשָׂ֥ר יָבֹֽאוּ׃
4 דִּבְרֵ֣י ֖עֲוֹנֹת גָּ֣בְרוּ מֶ֑נִּי ֜פְּשָׁעֵ֗ינוּ אַתָּ֥ה תְכַפְּרֵֽם׃
5 אַשְׁרֵ֚י| תִּֽבְחַ֣ר וּתְקָרֵב֘ יִשְׁכֹּ֪ן חֲצֵ֫רֶ֥יךָ ֖נִשְׂבְּעָה בְּט֣וּב בֵּיתֶ֑ךָ ֜קְדֹ֗שׁ הֵיכָלֶֽךָ׃
6 נ֚וֹרָא֨וֹת| בְּצֶ֣דֶק ֖תַּעֲנֵנוּ אֱלֹהֵ֣י יִשְׁעֵ֑נוּ מִבְטָ֥ח כָּל־קַצְוֵי־֝אֶ֗רֶץ וְיָ֣ם רְחֹקִֽים׃
7 מֵכִ֣ין הָרִ֣ים בְּכֹח֑וֹ ֜נֶאְזָ֗ר בִּגְבוּרָֽה׃
8 מַשְׁבִּ֤יחַ| שְׁא֣וֹן ֖יַמִּים שְׁא֥וֹן גַּלֵּיהֶ֗ם וַהֲמ֥וֹן לְאֻמִּֽים׃
9 וַיִּ֤ירְא֨וּ| יֹשְׁבֵ֣י ֖קְצָוֹת מֵאוֹתֹתֶ֑יךָ מ֚וֹצָֽאֵי־בֹ֖קֶר וָעֶ֣רֶב תַּרְנִֽין׃
10 פָּקַ֥דְתָּ הָאָ֨רֶץ| וַתְּשֹׁ֪קְקֶ֡הָ רַבַּ֬ת תַּעְשְׁרֶ֗נָּה פֶּ֣לֶג ֖אֱלֹהִים מָ֣לֵא מָ֑יִם תָּכִ֥ין ֜דְּגָנָ֗ם כִּי־כֵ֥ן תְּכִינֶֽהָ׃
11 תְּלָמֶ֣יהָ ֖רַוֵּה נַחֵ֣ת גְּדוּדֶ֑יהָ בִּרְבִיבִ֥ים ֜תְּמֹגְגֶ֗נָּה צִמְחָ֥הּ תְּבָרֵֽךְ׃
12 ֖עִטַּרְתָּ שְׁנַ֣ת טוֹבָתֶ֑ךָ ֜וּמַעְגָּלֶ֗יךָ יִרְעֲפ֥וּן דָּֽשֶׁן׃
13 ֖יִרְעֲפוּ נְא֣וֹת מִדְבָּ֑ר ֜וְגִ֗יל גְּבָע֥וֹת תַּחְגֹּֽרְנָה׃
14 לָבְשׁ֬וּ כָרִ֨ים| הַצֹּ֗אן וַעֲמָקִ֥ים יַֽעַטְפוּ־בָ֑ר ֜יִתְרוֹעֲע֗וּ אַף־יָשִֽׁירוּ׃