67 לַמְנַצֵּ֥ח בִּנְגִינֹ֗ת מִזְמ֥וֹר שִֽׁיר׃
2 אֱלֹהִ֗ים יְחָנֵּ֥נוּ וִֽיבָרְכֵ֑נוּ יָ֤אֵ֥ר פָּנָ֖יו אִתָּ֣נוּ סֶֽלָה׃
3 לָדַ֣עַת בָּאָ֣רֶץ דַּרְכֶּ֑ךָ בְּכָל־֜גּוֹיִ֗ם יְשׁוּעָתֶֽךָ׃
4 יוֹד֭וּךָ עַמִּ֥ים| אֱלֹהִ֑ים ֜יוֹד֗וּךָ עַמִּ֥ים כֻּלָּֽם׃
5 יִֽשְׂמְח֥וּ וִֽירַנְּנ֗וּ לְאֻ֫מִּ֥ים כִּֽי־תִשְׁפֹּ֣ט עַמִּ֣ים מִישׁ֑וֹר וּלְאֻמִּ֓ים| בָּאָ֖רֶץ תַּנְחֵ֣ם סֶֽלָה׃
6 יוֹד֭וּךָ עַמִּ֥ים| אֱלֹהִ֑ים ֜יוֹד֗וּךָ עַמִּ֥ים כֻּלָּֽם׃
7 ֖אֶרֶץ נָתְנָ֣ה יְבוּלָ֑הּ ֜יְבָרְכֵ֗נוּ אֱלֹהִ֥ים אֱלֹהֵֽינוּ׃
8 יְבָרְכֵ֥נוּ אֱלֹהִ֑ים וְיִֽירְא֥וּ ֜אֹת֗וֹ כָּל־אַפְסֵי־אָֽרֶץ׃