70 ֜לַמְנַצֵּ֗חַ לְדָוִ֥ד לְהַזְכִּֽיר׃
2 אֱלֹהִ֥ים לְהַצִּילֵ֑נִי ֜יְהוָ֗ה לְעֶזְרָ֥תִי חֽוּשָֽׁה׃
3 יֵבֹ֣שׁוּ וְיַחְפְּרוּ֘ מְבַקְשֵׁ֪י נַ֫פְשִׁ֥י יִסֹּ֣גוּ ֖אָחוֹר וְיִכָּלְמ֑וּ ֜חֲפֵצֵ֗י רָעָתִֽי׃
4 ֖יָשׁוּבוּ עַל־עֵ֣קֶב בָּשְׁתָּ֑ם ֜הָאֹמְרִ֗ים הֶ֮אָ֥ח| הֶאָֽח׃
5 יָ֮שִׂ֤ישׂוּ וְיִשְׂמְח֨וּ| בְּךָ֗ כָּֽל־מְבַ֫קְשֶׁ֥יךָ וְיֹאמְר֣וּ ֖תָמִיד יִגְדַּ֣ל אֱלֹהִ֑ים ֜אֹהֲבֵ֗י יְשׁוּעָתֶֽךָ׃
6 וַאֲנִ֤י| עָנִ֣י וְאֶבְיוֹן֘ אֱלֹהִ֪ים חֽוּשָׁ֫ה־לִּ֥י עֶזְרִ֣י וּמְפַלְטִ֣י אַ֑תָּה ֜יְהוָ֗ה אַל־תְּאַחַֽר׃