75 לַמְנַצֵּ֥חַ אַל־תַּשְׁחֵ֑ת מִזְמ֖וֹר לְאָסָ֣ף שִֽׁיר׃
2 ה֮וֹדִ֚ינוּ לְּכָ| אֱֽלֹהִ֗ים ֖הוֹדִינוּ וְקָר֣וֹב שְׁמֶ֑ךָ ֜סִפְּר֗וּ נִפְלְאוֹתֶֽיךָ׃
3 ֖כִּי אֶקַּ֣ח מוֹעֵ֑ד ֜אֲנִ֗י מֵישָׁרִ֥ים אֶשְׁפֹּֽט׃
4 נְֽמֹגִ֗ים אֶ֥רֶץ וְכָל־יֹשְׁבֶ֑יהָ אָנֹכִ֨י תִכַּ֖נְתִּי עַמּוּדֶ֣יהָ סֶּֽלָה׃
5 אָמַ֣רְתִּי ֖לַֽהוֹלְלִים אַל־תָּהֹ֑לּוּ ֜וְלָרְשָׁעִ֗ים אַל־תָּרִ֥ימוּ קָֽרֶן׃
6 אַל־תָּרִ֣ימוּ לַמָּר֣וֹם קַרְנְכֶ֑ם תְּדַבְּר֭וּ בְצַוָּ֣אר עָתָֽק׃
7 כִּ֤י לֹ֣א ֖מִמּוֹצָא וּמִֽמַּעֲרָ֑ב ֜וְלֹ֗א מִמִּדְבַּ֥ר הָרִֽים׃
8 כִּֽי־אֱלֹהִ֥ים שֹׁפֵ֑ט זֶ֥ה ֜יַשְׁפִּ֗יל וְזֶ֣ה יָרִֽים׃
9 כִּ֤י כ֪וֹס בְּֽיַד־יְהוָ֡ה וְיַ֤יִן חָמַ֨ר| מָ֥לֵא מֶסֶךְ֘ וַיַּגֵּ֪ר מִ֫זֶּ֥ה אַךְ־֖שְׁמָרֶיהָ יִמְצ֣וּ יִשְׁתּ֑וּ ֜כֹּ֗ל רִשְׁעֵי־אָֽרֶץ׃
10 ֖וַאֲנִי אַגִּ֣יד לְעֹלָ֑ם ֜אֲזַמְּרָ֗ה לֵאלֹהֵ֥י יַעֲקֹֽב׃
11 וְכָל־קַרְנֵ֣י רְשָׁעִ֣ים אֲגַדֵּ֑עַ ֜תְּרוֹמַ֗מְנָה קַֽרְנ֥וֹת צַדִּֽיק׃