81 לַמְנַצֵּ֬חַ| עַֽל־הַגִּתִּ֬ית לְאָסָֽף׃
2 ֖הַרְנִינוּ לֵאלֹהִ֣ים עוּזֵּ֑נוּ ֜הָרִ֗יעוּ לֵאלֹהֵ֥י יַעֲקֹֽב׃
3 שְֽׂאוּ־֖זִמְרָה וּתְנוּ־תֹ֑ף כִּנּ֖וֹר נָעִ֣ים עִם־נָֽבֶל׃
4 תִּקְע֣וּ בַחֹ֣דֶשׁ שׁוֹפָ֑ר ֜בַּכֵּ֗סֶה לְי֣וֹם חַגֵּֽנוּ׃
5 כִּ֤י חֹ֣ק לְיִשְׂרָאֵ֣ל ה֑וּא ֜מִשְׁפָּ֗ט לֵאלֹהֵ֥י יַעֲקֹֽב׃
6 עֵ֤דוּת| בִּֽיה֮וֹסֵ֤ף שָׂמ֗וֹ ֖בְּצֵאתוֹ עַל־אֶ֣רֶץ מִצְרָ֑יִם שְׂפַ֖ת לֹא־יָדַ֣עְתִּי אֶשְׁמָֽע׃
7 הֲסִיר֣וֹתִי מִסֵּ֣בֶל שִׁכְמ֑וֹ ֜כַּפָּ֗יו מִדּ֥וּד תַּעֲבֹֽרְנָה׃
8 בַּצָּרָ֥ה קָרָ֗אתָ וָאֲחַ֫לְּצֶ֥ךָּ ֖אֶעֶנְךָ בְּסֵ֣תֶר רַ֑עַם אֶבְחָֽנְךָ֙ עַל־מֵ֖י מְרִיבָ֣ה סֶֽלָה׃
9 שְׁמַ֣ע ֖עַמִּי וְאָעִ֣ידָה בָּ֑ךְ ֜יִשְׂרָאֵ֗ל אִם־תִּֽשְׁמַֽע־לִֽי׃
10 לֹֽא־יִהְיֶ֣ה ֖בְךָ אֵ֣ל זָ֑ר וְלֹ֥א ֜תִשְׁתַּחֲוֶ֗ה לְאֵ֣ל נֵכָֽר׃
11 אָנֹכִ֨י| יְה֮וָ֤ה אֱלֹהֶ֗יךָ ֖הַֽמַּעַלְךָ מֵאֶ֣רֶץ מִצְרָ֑יִם הַרְחֶב־֜פִּ֗יךָ וַאֲמַלְאֵֽהוּ׃
12 וְלֹא־שָׁמַ֣ע עַמִּ֣י לְקוֹלִ֑י ֜וְיִשְׂרָאֵ֗ל לֹא־אָ֥בָה לִֽי׃
13 ֖וָֽאֲשַׁלְּחֵהוּ בִּשְׁרִיר֣וּת לִבָּ֑ם ֜יֵלְכ֗וּ בְּֽמוֹעֲצוֹתֵיהֶֽם׃
14 ל֗וּ ֖עַמִּי שֹׁמֵ֣עַֽ לִ֑י ֜יִשְׂרָאֵ֗ל בִּדְרָכַ֥י יְהַלֵּֽכוּ׃
15 ֖כִּמְעַט אוֹיְבֵיהֶ֣ם אַכְנִ֑יעַ וְעַ֥ל ֜צָרֵיהֶ֗ם אָשִׁ֥יב יָדִֽי׃
16 מְשַׂנְאֵ֣י ֖יְהוָה יְכַֽחֲשׁוּ־ל֑וֹ וִיהִ֖י עִתָּ֣ם לְעוֹלָֽם׃
17 ֖וַֽיַּאֲכִילֵהוּ מֵחֵ֣לֶב חִטָּ֑ה ֜וּמִצּ֗וּר דְּבַ֣שׁ אַשְׂבִּיעֶֽךָ׃